لاہور ( سپورٹس ڈیسک) پاکستان سپر لیگ کی فرنچائز دی پنڈیز نے کرکٹر محمد رضوان سے متعلق اپنے مالک احسان طاہر سے منسوب بیانات کو من گھڑت قرار دیتے ہوئے وضاحت جاری کردی۔فرنچائز کے مطابق احسان طاہر نے محمد رضوان اور این سی سی آئی اے کے معاملے پر کوئی بیان جاری نہیں کیا، جبکہ ان سے منسوب کرکے شائع کیے جانے والے بیانات مکمل طور پر بے بنیاد ہیں۔دی پنڈیز نے وضاحتی بیان میں کہا کہ احسان طاہر سے منسوب مواد کی غیر مجاز اشاعت اور غلط نسبت کو سنجیدگی سے لیا جا رہا ہے۔فرنچائز نے متعلقہ میڈیا ادارے سے مطالبہ کیا کہ منسوب بیان فوری طور پر واپس لے کر واضح تصحیح جاری کی جائے اور عوامی طور پر معذرت بھی کی جائے۔بیان میں مزید کہا گیا کہ احسان طاہر اور دی پنڈیز کے مفادات اور ساکھ کے تحفظ کیلئے مناسب قانونی و دیگر اقدامات کا حق محفوظ رکھا گیا ہے۔
