پیٹرول و ڈیزل کی قیمتوں میں کمی کے بعد ٹرانسپورٹ کرایوں میں 5 فیصد کمی کا اعلان

لاہور( کامرس ڈیسک) پیٹرول اور ڈیزل کی فی لیٹر قیمت میں 22 روپے کمی کے فیصلے کے بعد ٹرانسپورٹ شعبے نے بھی کرایوں میں کمی کا اعلان کر دیا ہے۔پاکستان منی مزدا گڈز ٹرانسپورٹ ایسوسی ایشن نے اعلان کیا ہے کہ کرایوں میں 5 فیصد کمی کی جائے گی تاکہ عوام کو براہِ راست ریلیف فراہم کیا جا سکے۔ایسوسی ایشن کے صدر حاجی شیر علی چوہدری نے کہا کہ حکومت کے فیصلے کے بعد ٹرانسپورٹرز بھی عوام کو ریلیف دینے کے لیے تیار ہیں۔ ان کے مطابق یہ اقدام عید کے موقع پر ایک مثبت پیش رفت ہے۔انہوں نے مزید کہا کہ وزیراعظم کے فیصلے کو سراہتے ہوئے کہا کہ حکومت کے ساتھ مل کر عوام کو سہولت فراہم کرنے کا سلسلہ جاری رکھا جائے گا۔اعلان کے مطابق نئے کم کیے گئے کرائے آج رات بارہ بجے سے نافذ العمل ہوں گے، جس کے بعد گڈز ٹرانسپورٹ کے موجودہ کرایوں میں 5 فیصد کمی ہو جائے گی۔معاشی ماہرین کے مطابق ایندھن کی قیمتوں میں کمی کے اثرات اگر مختلف شعبوں میں منتقل ہوں تو اس سے عام صارفین کو براہِ راست ریلیف مل سکتا ہے۔