واشنگٹن( مانیٹرنگ ڈیسک)امریکی صدر ڈونلڈ ٹرمپ نے کہا ہے کہ ایران کو مذاکرات کی میز پر واپس لانے کیلئے امریکا نے کوئی مدت مقرر نہیں کی اور واشنگٹن تہران سے بات چیت کیلئے جلد بازی کا شکار نہیں۔عرب ذرائع ابلاغ سے گفتگو میں ٹرمپ نے کہا کہ ایران کو مذاکرات میں واپسی کیلئے کوئی آخری مہلت نہیں دی گئی، امریکا اپنی مرضی کے مطابق وقت کا انتخاب کرے گا۔انہوں نے دعویٰ کیا کہ امریکا بڑی کامیابی حاصل کررہا ہے، جبکہ ایران کو بڑھتی مہنگائی، معاشی مشکلات اور حکومتی پالیسیوں کے باعث مسائل کا سامنا ہے۔ٹرمپ کے مطابق ایران کے خلاف اقتصادی دباؤ اور فوجی کارروائی، دونوں مؤثر ثابت ہورہے ہیں۔واضح رہے کہ جمعے کو امریکا کی جانب سے ایران کے خلاف جنگ شروع کیے جانے کو 6 ماہ مکمل ہوجائیں گے۔ ٹرمپ نے جنگ کے آغاز کے بعد کئی مرتبہ تنازع جلد ختم ہونے کی امید ظاہر کی تھی، حتیٰ کہ ایک موقع پر اسے 4 سے 6 ہفتوں میں ختم ہونے کا امکان بھی بتایا تھا۔جون میں امریکا اور ایران کے درمیان 60 روزہ مفاہمتی یادداشت طے پائی تھی، جس میں آبنائے ہرمز کی آمدورفت، پابندیوں میں نرمی اور ایرانی جوہری پروگرام پر مذاکرات سمیت مختلف امور شامل تھے، تاہم یہ معاہدہ رواں ماہ کے آغاز میں ختم ہوگیا۔
