لاہور( سپورٹس ڈیسک) پاکستان کرکٹ ٹیم کے کوچنگ اسٹاف میں غیر ملکی کنسلٹنٹس کی شمولیت کا امکان ہے۔میڈیا ذرائع کے مطابق پاکستان کرکٹ بورڈ کی سابق آسٹریلوی فاسٹ بولر شان ٹیٹ سے بات چیت جاری ہے اور انہیں بولنگ کنسلٹنٹ مقرر کرنے پر غور کیا جا رہا ہے۔ذرائع کا کہنا ہے کہ نیوزی لینڈ کے سابق کرکٹر مارٹن گپٹل سے بھی رابطہ کیا گیا ہے اور انہیں فیلڈنگ کنسلٹنٹ کی ذمہ داری دینے کے حوالے سے معاملات آگے بڑھ رہے ہیں۔مارٹن گپٹل کے ساتھ معاہدہ طے پانے کے امکانات بھی ظاہر کیے جا رہے ہیں۔شان ٹیٹ 2022-23 میں پاکستان ٹیم کے بولنگ کوچ رہ چکے ہیں، جبکہ حال ہی میں وہ بنگلادیش کی ٹیم کے ساتھ وابستہ تھے۔ تاہم انہوں نے خاندانی مصروفیات کے باعث تینوں فارمیٹس کی کوچنگ سے معذرت کرلی تھی۔خیال رہے کہ ایشلے نوفکے کے استعفے کے بعد پی سی بی نے بولنگ کوچ کی آسامی کے لیے اشتہار دیا تھا، جبکہ فیلڈنگ کوچ کے عہدے کے لیے بھی درخواستیں طلب کی گئی تھیں۔
