لاہور( کامرس ڈیسک) ملک میں آئل مارکیٹنگ کمپنیز کی جانب سے مارچ کے دوران پٹرولیم مصنوعات کی فروخت میں نمایاں اضافہ ریکارڈ کیا گیا ہے۔ ذرائع کے مطابق مجموعی طور پر تیل کی فروخت تقریباً 13 فیصد بڑھ گئی، جس کا سبب عید کی تعطیلات اور ہفتہ وار چھٹیوں کے دوران عوام کے سفر میں اضافہ بتایا گیا ہے۔پن بجلی کی پیداوار میں کمی کے باعث بجلی گھروں نے فرنس آئل کی خریداری میں اضافہ کیا، جس سے مجموعی طلب مزید بڑھ گئی۔ مارچ میں پٹرول کی فروخت فروری کے مقابلے میں 8 فیصد بڑھ کر 6 لاکھ 70 ہزار ٹن تک پہنچ گئی، جبکہ فروری میں یہ 6 لاکھ 20 ہزار ٹن تھی۔ اسی طرح ڈیزل کی فروخت میں 13 فیصد اضافہ ریکارڈ ہوا اور مارچ میں یہ 5 لاکھ 90 ہزار ٹن رہی، جو فروری میں 5 لاکھ 20 ہزار ٹن تھی۔فرنس آئل کی فروخت میں بھی غیر معمولی اضافہ دیکھا گیا، مارچ میں فروخت 90 ہزار ٹن تک پہنچ گئی جبکہ فروری میں یہ صرف 40 ہزار ٹن تھی۔حکومت نے پٹرول اور ڈیزل کی بچت کے لیے مختلف اقدامات اور تعطیلات دی تھیں، تاہم تعطیلات کے دوران عوام کے سفر میں اضافے نے پٹرولیم مصنوعات کی طلب کو مزید بڑھا دیا۔ ماہرین کے مطابق اگر توانائی کے متبادل ذرائع میں بہتری نہ آئی تو آئندہ مہینوں میں بھی تیل کی طلب میں اضافہ جاری رہ سکتا ہے۔
