واشنگٹن ( مانیٹرنگ ڈیسک) امریکا اور اس کے اتحادی ممالک نے چین پر جاسوسی کے الزامات عائد کرتے ہوئے اسے باضابطہ وارننگ جاری کی ہے۔امریکی اخبار واشنگٹن پوسٹ کی رپورٹ کے مطابق امریکا، برطانیہ، کینیڈا، آسٹریلیا اور نیوزی لینڈ نے مشترکہ طور پر چین پر الزام لگایا ہے کہ وہ ملازمت کے پلیٹ فارمز کے ذریعے حساس معلومات حاصل کرنے کی کوشش کر رہا ہے۔رپورٹ میں کہا گیا ہے کہ ان ممالک کے مطابق چین جعلی پروفائلز اور نوکریوں کی پیشکش کے ذریعے افراد کو نشانہ بنا کر ان سے اہم اور حساس معلومات حاصل کرنے کی کوشش کرتا ہے۔لندن میں چینی سفارتخانے نے ان الزامات کو سختی سے مسترد کرتے ہوئے کہا ہے کہ چین پر جاسوسی کے الزامات بے بنیاد، من گھڑت اور بدنیتی پر مبنی ہیں۔ماہرین کے مطابق یہ تنازع صرف جاسوسی کے الزامات تک محدود نہیں بلکہ امریکا اور چین کے درمیان جاری وسیع تر اسٹریٹجک مقابلے کا حصہ ہے، جس میں سائبر سکیورٹی، جدید ٹیکنالوجی، مصنوعی ذہانت، سیمی کنڈکٹرز اور علاقائی سلامتی جیسے اہم شعبے شامل ہیں۔امریکا اور اس کے اتحادیوں کا مؤقف ہے کہ چین منظم انداز میں سائبر اور انٹیلی جنس سرگرمیوں کے ذریعے حساس معلومات حاصل کرنے کی کوشش کر رہا ہے، جبکہ چین ان تمام الزامات کو مسترد کرتے ہوئے انہیں سیاسی دباؤ اور پروپیگنڈا قرار دیتا ہے۔
