واشنگٹن( مانیٹرنگ ڈیسک) امریکا نے زیرِ تعلیم غیر ملکی طلبا کے ویزوں میں توسیع کے لیے سخت نئے قواعد متعارف کراتے ہوئے اس عمل کو لازمی جانچ پڑتال اور وفاقی منظوری سے مشروط کر دیا ہے۔امریکی محکمۂ خارجہ کے مطابق محکمۂ داخلی سلامتی نے حتمی ضابطہ جاری کیا ہے، جس کے تحت "مدتِ قیام" (Duration of Status) سے متعلق قانونی سقم ختم کر دیا گیا ہے، جو پہلے غیر ملکی طلبا، تبادلہ پروگرام کے شرکا اور غیر ملکی ذرائع ابلاغ کے نمائندوں کو معمول کی حکومتی نگرانی کے بغیر طویل عرصے تک امریکا میں رہنے کی اجازت دیتا تھا۔نئے ضابطے کے مطابق ایف (F)، جے (J) اور آئی (I) درجے کے غیر تارک وطن ویزا رکھنے والوں کے لیے امریکا میں داخلے اور قیام کی ایک مقررہ مدت مقرر کر دی گئی ہے۔اس کے تحت ایف اور جے ویزوں کی زیادہ سے زیادہ مدت چار سال ہوگی، جبکہ ویزے میں توسیع کے لیے وفاقی حکومت کی باقاعدہ منظوری لازمی ہوگی۔ویزے میں توسیع کے خواہش مند افراد کو بائیومیٹرک تصدیق، پس منظر کی جانچ پڑتال اور ممکنہ دھوکہ دہی کی تحقیقات سمیت مختلف مراحل سے گزرنا ہوگا۔امریکی محکمۂ خارجہ کے مطابق ایف-1 ویزا رکھنے والے طلبا کے لیے تعلیم مکمل ہونے کے بعد امریکا چھوڑنے کی رعایتی مدت بھی 60 دن سے کم کر کے 30 دن کر دی گئی ہے۔
