بیساکھی میلہ، سکھ یاتریوں کی کرتارپور آمد، پرتپاک استقبال، امن و محبت کا پیغام گونج اٹھا

نارووال( پاکستان خبر) بیساکھی میلے میں شرکت کے لیے دنیا بھر سے سکھ یاتریوں کی آمد کا سلسلہ جاری ہے، مختلف ممالک سے آنے والے قافلے کرتارپور صاحب پہنچ گئے جہاں ان کا پرتپاک استقبال کیا گیا۔بھارت سمیت دیگر ممالک سے آنے والے یاتریوں کا ضلعی انتظامیہ نے بھرپور خیرمقدم کیا، اس موقع پر پھولوں کی پتیاں نچھاور کی گئیں اور مہمانوں کو ہار پہنائے گئے، استقبالیہ تقریب میں ضلعی افسران بھی شریک ہوئے۔ڈپٹی کمشنر نارووال نے اس موقع پر کہا کہ پاکستان امن اور محبت کا گہوارہ ہے، اقلیتوں کو خصوصی اہمیت حاصل ہے اور سکھ یاتریوں کی خدمت ہمارے لیے باعث فخر ہے۔انہوں نے کہا کہ بین الاقوامی یاتریوں کی آمد سے ثقافتی ہم آہنگی کو فروغ ملتا ہے، جبکہ رواداری اور بھائی چارہ ہماری پہچان ہے، سکھ برادری کے ساتھ پاکستان کے تاریخی اور روحانی تعلقات نہایت مضبوط ہیں۔ضلعی انتظامیہ کا کہنا تھا کہ دنیا بھر سے آنے والے یاتری دراصل پاکستان کے مثبت تشخص کے سفیر ہیں جو امن اور محبت کا پیغام لے کر جاتے ہیں۔