ماسکو( ویب ڈیسک) روسی ٹیکنالوجی کمپنی وی کے نے تصدیق کی ہے کہ اس کی وی کے اور میکس ایپس کو گوگل پلے اسٹور سے ہٹا دیا گیا ہے، تاہم جن صارفین کے موبائل فونز میں یہ ایپس پہلے سے نصب ہیں، وہ انہیں معمول کے مطابق استعمال کرتے رہیں گے۔کمپنی کے جاری کردہ بیان کے مطابق اینڈرائیڈ صارفین کو وی کے اور میکس ایپس پر پیغامات، کالز اور دیگر اطلاعات معمول کے مطابق موصول ہوتی رہیں گی، اور ایپس کی موجودہ فعالیت متاثر نہیں ہوگی۔بیان میں کہا گیا ہے کہ اینڈرائیڈ صارفین ان ایپس کو آر یو اسٹور، ہواوے ایپ گیلری، سام سنگ گلیکسی اسٹور، شیاؤمی گیٹ ایپس سمیت دیگر متبادل ایپ اسٹورز سے ڈاؤن لوڈ کر سکتے ہیں۔کمپنی نے یہ بھی یاد دلایا کہ اس سے قبل ایپل بھی وی کے ہولڈنگ کی ایپس اور میکس میسنجر کو اپنے ایپ اسٹور سے ہٹا چکا ہے۔ وی کے کے مطابق ایپل نے یہ فیصلہ یکطرفہ طور پر اور پیشگی اطلاع کے بغیر کیا تھا، جس کے بعد آئی فون صارفین کو میسنجر پر نئے پیغامات اور کالز سے متعلق اطلاعات موصول ہونا بند ہو گئی تھیں۔
