کیلیفونیا( ویب ڈیسک)واٹس ایپ آئی فون صارفین کے لیے ایک نئے کلاؤڈ بیک اپ فیچر پر کام کر رہا ہے، جس کے ذریعے چیٹس کا بیک اپ ایپل کے آئی کلاؤڈ کے بجائے براہِ راست واٹس ایپ کے سرورز پر محفوظ کیا جا سکے گا۔ٹیکنالوجی ویب سائٹ واٹس ایپ بیٹا انفو کے مطابق یہ فیچر ابھی تیاری کے مرحلے میں ہے اور فی الحال بیٹا ورژن استعمال کرنے والے صارفین کے لیے بھی دستیاب نہیں۔اس وقت آئی فون پر واٹس ایپ چیٹس کا بیک اپ صرف آئی کلاؤڈ میں محفوظ کیا جاتا ہے، جبکہ ایپل مفت صارفین کو 5 جی بی کلاؤڈ اسٹوریج فراہم کرتا ہے، جو تصاویر، ویڈیوز، دستاویزات، ڈیوائس بیک اپ اور دیگر ایپس کے ڈیٹا کے ساتھ مشترکہ طور پر استعمال ہوتی ہے۔ اسی وجہ سے واٹس ایپ بیک اپ اکثر دستیاب اسٹوریج جلد بھر دیتا ہے۔اس مسئلے کے حل کے لیے واٹس ایپ اپنی علیحدہ کلاؤڈ بیک اپ سروس متعارف کرا رہا ہے، جس کے بعد صارفین اپنی ضرورت کے مطابق آئی کلاؤڈ یا واٹس ایپ کے سرورز میں سے کسی ایک کو بیک اپ کے لیے منتخب کر سکیں گے۔رپورٹ کے مطابق آئی کلاؤڈ بدستور ڈیفالٹ بیک اپ آپشن رہے گا، جبکہ موجودہ طریقہ استعمال کرنے والے صارفین کو اپنی سیٹنگز میں کسی قسم کی تبدیلی کرنے کی ضرورت نہیں ہوگی۔اس نئے فیچر سے آئی فون صارفین کو بیک اپ کے لیے زیادہ لچک، بہتر رازداری اور اضافی کلاؤڈ اسٹوریج کے متبادل آپشنز فراہم ہونے کی توقع ہے۔
