اسلام آباد( کامرس ڈیسک) عالمی بینک نے پاکستان کے توانائی شعبے میں بہتری کیلئے 37 کروڑ 59 لاکھ ڈالر مالی معاونت کی منظوری دے دی ہے۔عالمی بینک کے اعلامیے کے مطابق یہ رقم 10 سالہ توانائی پروگرام کے پہلے مرحلے پر خرچ کی جائے گی، جس کا مقصد ملک میں بجلی کی ترسیل کے نظام کو جدید اور مؤثر بنانا ہے۔ مالی معاونت سے قومی بجلی ترسیلی نظام کو بہتر بنانے اور بجلی کی بندش میں کمی لانے کیلئے منصوبے شروع کیے جائیں گے۔اعلامیے میں بتایا گیا ہے کہ منصوبے کے تحت ہوا سے بجلی پیدا کرنے کے مزید 640 میگاواٹ منصوبوں کو قومی بجلی نظام میں شامل کیا جائے گا۔ یہ اقدام قابلِ تجدید توانائی کے فروغ میں اہم کردار ادا کرے گا جبکہ جدید ترسیلی نظام کے ذریعے بجلی کے اخراجات کم کرنے میں بھی مدد ملے گی۔عالمی بینک کے مطابق اس منصوبے سے گھریلو، صنعتی اور تجارتی صارفین کو بجلی کی زیادہ بہتر اور قابلِ اعتماد فراہمی ممکن ہو سکے گی۔ پروگرام کے تحت پاکستان کے بجلی نظام کو موسمیاتی تبدیلیوں کے اثرات سے محفوظ بنانے کیلئے بھی اقدامات کیے جائیں گے۔منصوبے کے نتیجے میں ہر سال تقریباً 8 لاکھ 32 ہزار ٹن کاربن کے اخراج میں کمی متوقع ہے، جبکہ یہ حکومت کی بجلی کے شعبے میں اصلاحات کو مزید مضبوط بنانے میں معاون ثابت ہوگا۔عالمی بینک نے کہا ہے کہ منصوبے سے بجلی کی ترسیل کا نظام زیادہ مستحکم ہوگا اور پاکستان میں قابلِ تجدید توانائی کے حصے میں اضافے کی کوششوں کو تقویت ملے گی۔
