یوٹیوبر کا حیران کن کارنامہ، دیوہیکل آر سی ایئربس اے 380 ماڈل تیار

نیو یارک ( ویب ڈیسک) آر سی طیاروں کے شوقین اور مشہور یوٹیوبر ریمی آر سی نے اپنی اب تک کی سب سے بڑی اور حیران کن تخلیق پیش کرتے ہوئے ایئربس اے 380 کا 8/1 اسکیل پر مبنی آر سی ماڈل تیار کر لیا ہے۔یہ دیوہیکل ماڈل ایک بڑے فوم بلاک کو تراش کر بنایا گیا ہے، جسے بعد میں فائبر گلاس اور کاربن فائبر سے مضبوط کیا گیا۔ طیارے کے پروں کے نیچے چار طاقتور موٹرز نصب کی گئی ہیں جو تقریباً آٹھ سو پاؤنڈ وزن کے اس ماڈل کو پرواز کی صلاحیت فراہم کرتی ہیں۔ریمی آر سی نے اپنی ویڈیو سیریز میں بتایا کہ اس منصوبے میں سب سے بڑا چیلنج طیارے کے بڑھتے ہوئے وزن کو قابو میں رکھنا تھا۔ اس مقصد کے لیے انتہائی ہلکے مگر مضبوط مواد استعمال کیے گئے، تاہم کامیابی کے لیے متعدد بار تجربات اور آزمائشیں کرنی پڑیں۔دلچسپ بات یہ ہے کہ یہ ماڈل اتنا بڑا ہے کہ ایک شخص اس کے اندر آرام سے لیٹ سکتا ہے، جس سے اس کے غیر معمولی سائز کا اندازہ لگایا جا سکتا ہے۔اگرچہ اس ماڈل کی مکمل رفتار سامنے نہیں لائی گئی، تاہم یہ بات حیران کن ہے کہ یہ طیارہ حقیقی جہازوں کی طرح مکمل کنٹرول شدہ لینڈنگ گیئر کے ساتھ رن وے سے ٹیک آف اور لینڈنگ کرنے کی صلاحیت رکھتا ہے۔یہ تخلیق انجینئرنگ اور شوق کے امتزاج کی ایک منفرد مثال قرار دی جا رہی ہے، جس نے دنیا بھر کے آر سی اور ایوی ایشن شائقین کی توجہ حاصل کر لی ہے۔