نیویارک( ویب ڈیسک)یوٹیوب نے اعلان کیا ہے کہ وہ مصنوعی ذہانت کے ذریعے تیار یا تبدیل کیے گئے مواد کی شناخت کے لیے مزید شفافیت اور سخت نگرانی کا نظام نافذ کر رہا ہے۔نئی پالیسی کے تحت اب یوٹیوب پر اپ لوڈ ہونے والی ہر وہ ویڈیو جس میں نمایاں طور پر مصنوعی ذہانت کا استعمال کیا گیا ہو، اس پر واضح طور پر “اے آئی سے تیار کردہ مواد” کا لیبل ظاہر کیا جائے گا۔طویل ویڈیوز میں یہ لیبل ویڈیو پلیئر کے نیچے اور تفصیل کے حصے کے اوپر دکھایا جائے گا، جبکہ مختصر ویڈیوز (شارٹس) میں یہ براہِ راست ویڈیو کے اوپر نمایاں انداز میں ظاہر ہوگا۔کمپنی کے مطابق اگرچہ اب بھی تخلیق کاروں پر یہ ذمہ داری عائد ہوتی ہے کہ وہ اپنی اے آئی سے تیار کردہ ویڈیوز کو خود ٹیگ کریں، تاہم اب ایک نیا خودکار مواد شناختی نظام بھی متعارف کرایا گیا ہے جو ویڈیوز کا تجزیہ کر کے اے آئی مواد کی نشاندہی کر سکے گا، چاہے اسے دستی طور پر ٹیگ نہ کیا گیا ہو۔یوٹیوب نے یہ بھی واضح کیا ہے کہ اگر کسی ویڈیو کو غلطی سے اے آئی سے تیار شدہ قرار دے دیا جائے تو تخلیق کار یوٹیوب اسٹوڈیو کے ذریعے اس معلومات کو درست یا اپ ڈیٹ کر سکتے ہیں۔یہ اقدام آن لائن مواد میں شفافیت بڑھانے اور ناظرین کو اصل اور مصنوعی ذہانت سے تیار مواد میں فرق کرنے میں مدد دینے کے لیے اٹھایا گیا ہے۔
