لاہور( شوبز ڈیسک) پاکستانی اداکار آغا علی نے اپنی شادی سے متعلق گفتگو کرتے ہوئے کہا ہے کہ جب بھی وہ شادی کریں گے تو اس کا اعلان فخر کے ساتھ کریں گے۔حال ہی میں ایک نجی ٹی وی کو دیے گئے انٹرویو میں آغا علی نے شوبز انڈسٹری، ذاتی زندگی اور سوشل میڈیا سے متعلق مختلف موضوعات پر بات کی۔اداکار سے جب سوشل میڈیا پر اپنی ذاتی زندگی شیئر کرنے کے حوالے سے سوال کیا گیا تو انہوں نے کہا کہ وہ کسی بھی تعلق کو عوام کے سامنے لانے کے حق میں نہیں ہیں، کیونکہ کسی بھی رشتے میں صرف ایک شخص نہیں بلکہ دوسرا فرد بھی شامل ہوتا ہے۔آغا علی نے کہا کہ ان کے خیال میں شادی سے پہلے تعلقات سے متعلق باتیں ظاہر نہیں کرنی چاہئیں، تاہم جب بھی ان کی شادی ہوگی وہ اس کا اعلان ضرور کریں گے۔انہوں نے اپنے تعلقات کو نجی رکھنے کی وجہ بتاتے ہوئے کہا کہ کسی بھی رشتے کی ضمانت نہیں ہوتی اور یہ معلوم نہیں ہوتا کہ مستقبل میں کوئی تعلق کس سمت جائے گا۔ ان کا کہنا تھا کہ وقت کے ساتھ لوگوں میں مایوسی بڑھ رہی ہے اور سوشل میڈیا پر تنقید یا غیر ضروری گفتگو بھی ایک عام رجحان بنتی جا رہی ہے۔واضح رہے کہ آغا علی اور اداکارہ حنا الطاف کی شادی 2020 میں ہوئی تھی، جو تقریباً چار سال بعد اختتام پذیر ہو گئی۔
