ٹک ٹاکر علی حیدر آبادی اور سابق اہلیہ کے درمیان الزامات کی جنگ، ویڈیوز وائرل

لاہور( شوبز ڈیسک)ٹک ٹاکر علی حیدر آبادی اور ان کی سابق اہلیہ زینب علی کے درمیان الزامات اور جوابی دعوؤں کا سلسلہ سوشل میڈیا پر شدت اختیار کر گیا ہے، جہاں دونوں کی جانب سے ایک دوسرے کے خلاف ویڈیوز وائرل ہو رہی ہیں۔زینب علی نے اپنے ویڈیو بیان میں علی حیدر آبادی پر سنگین الزامات عائد کرتے ہوئے دعویٰ کیا کہ انہوں نے شادی کے تین سال شدید ذہنی اذیت اور مبینہ تشدد کے ساتھ گزارے۔ ان کا کہنا تھا کہ علی ان سے بے وفائی کرتے رہے اور اس سے قبل بھی متعدد شادیاں کر کے طلاق دے چکے ہیں۔ انہوں نے یہ بھی الزام لگایا کہ علی خواتین کو ویوز اور شہرت کے لیے استعمال کرتے ہیں اور کم عمر لڑکیوں کو مبینہ طور پر جھانسہ دیتے ہیں۔زینب علی نے مزید دعویٰ کیا کہ علی نے کئی لڑکیوں سے شادی کا وعدہ کر کے مالی فوائد بھی حاصل کیے، جبکہ ایک واقعے میں تشدد کے باعث ان کی انگلی ٹوٹنے کا بھی ذکر کیا گیا۔ان الزامات کے بعد علی حیدر آبادی کی جانب سے بھی ویڈیو بیان سامنے آیا ہے، جس میں انہوں نے تمام الزامات کو مسترد کیا ہے۔ ان کا کہنا تھا کہ یہ ان کی “پہلی اور آخری ویڈیو” ہے کیونکہ وہ اس معاملے پر مزید بات نہیں کرنا چاہتے، تاہم جب ان کے خلاف ویڈیوز بنائی گئیں تو انہیں وضاحت دینا پڑی۔انہوں نے کہا کہ جس طلاق والی ویڈیو کا حوالہ دیا جا رہا ہے، اس میں واضح طور پر دیکھا جا سکتا ہے کہ انہوں نے کسی قسم کا تشدد نہیں کیا۔ ان کے مطابق یہ ویڈیو پہلے سے اس لیے بنائی گئی تھی تاکہ مستقبل میں کسی بھی ممکنہ بلیک میلنگ یا غلط بیانی سے بچا جا سکے۔سوشل میڈیا پر اس تنازع نے صارفین کی توجہ حاصل کر لی ہے، تاہم دونوں فریقین کی جانب سے الزامات اور تردید کا سلسلہ بدستور جاری ہے۔