ممبئی( شو بز ڈیسک)بالی ووڈ اداکارہ عالیہ بھٹ کے فلم ’تمباڈ 2‘ کا حصہ بننے کی تصدیق کر دی گئی ہے، جس کے بعد مداحوں میں خوشی کی لہر دوڑ گئی ہے۔اداکار سوہم شاہ نے انسٹاگرام پر اعلان کرتے ہوئے کہا کہ ایک نئے سفر کا آغاز ہو گیا ہے، اور انہوں نے عالیہ بھٹ کو فلم کی ٹیم میں خوش آمدید کہا۔تفصیلات کے مطابق ’تمباڈ 2‘ عالیہ بھٹ کی پہلی مکمل ہارر فلم ہوگی۔ فلم میں ان کا کردار محدود نہیں ہوگا بلکہ کہانی کا ایک اہم حصہ ہوگا، جو فلم کے بڑے اور فیصلہ کن موڑ سے منسلک ہے۔عالیہ بھٹ نے اپنے بیان میں کہا کہ انہوں نے پہلی بار ’تمباڈ‘ دیکھی تو یہ فلم ان کے ذہن میں گھر کر گئی تھی۔ ان کے مطابق اس منفرد اور پراسرار دنیا کا حصہ بننا ان کے لیے اعزاز کی بات ہے، جبکہ وہ سوہم شاہ اور نوازالدین صدیقی کے ساتھ کام کرنے کے لیے بھی پُرجوش ہیں۔رپورٹس کے مطابق فلم کا بجٹ تقریباً 100 کروڑ بھارتی روپے رکھا گیا ہے، جبکہ ممبئی میں شوٹنگ کے لیے ایک بڑا سیٹ تیار کیا جا رہا ہے۔ ہدایتکار آدیش پرساد کی یہ فلم 3 دسمبر 2027 کو سینما گھروں میں پیش کی جائے گی۔
