ممبئی( شوبز ڈیسک) بالی ووڈ کے معروف اداکار امیتابھ بچن نے اپنی ایک سوشل میڈیا پوسٹ کے بعد پھیلنے والی صحت سے متعلق خبروں کی وضاحت کرتے ہوئے کہا ہے کہ ان کی پوسٹ کو غلط انداز میں سمجھا گیا۔83 سالہ اداکار نے میڈیا سے گفتگو کرتے ہوئے واضح کیا کہ نہ تو انہوں نے کوئی سرجری کروائی ہے اور نہ ہی ان کی صحت سے متعلق تشویشناک اطلاعات درست ہیں۔امیتابھ بچن کے مطابق ان کے بلاگ پر استعمال ہونے والی طبی اصطلاحات حقیقت میں استعارے کے طور پر لکھی گئی تھیں، جن کا مقصد فیفا ورلڈ کپ فائنل میں اسپین کے ہاتھوں ارجنٹینا کی شکست کے بعد ایک چیمپیئن کی ذہنی کیفیت کو بیان کرنا تھا۔انہوں نے کہا کہ وہ بالکل خیریت سے ہیں اور ان کی کوئی سرجری نہیں ہوئی۔ ان کا کہنا تھا کہ انہوں نے صرف یہ مثال دی تھی کہ جس طرح کسی مریض کے لیے سرجری یا انتہائی نگہداشت کے بعد گھر واپسی کا مرحلہ جسمانی اور ذہنی طور پر مشکل ہوتا ہے، اسی طرح کسی چیمپیئن کے لیے شکست کے بعد خود کو سنبھالنا بھی ایک کٹھن مرحلہ ہوتا ہے۔اداکار نے وضاحت کی کہ ان کا اشارہ فیفا ورلڈ کپ میں اسپین کے خلاف ارجنٹینا کی شکست اور لیونل میسی جیسے عظیم کھلاڑی کی کیفیت کی جانب تھا، تاہم لوگوں نے اسے ان کی اپنی صحت سے متعلق سمجھ لیا۔امیتابھ بچن نے مداحوں کو یقین دلاتے ہوئے کہا کہ انہیں ان کی صحت کے حوالے سے پریشان ہونے کی ضرورت نہیں، وہ مکمل طور پر خیریت سے ہیں۔واضح رہے کہ یہ وضاحت ان کی اس سوشل میڈیا پوسٹ کے چند گھنٹوں بعد سامنے آئی جس میں انہوں نے لیونل میسی اور ارجنٹینا کی اسپین کے ہاتھوں شکست پر اپنے خیالات کا اظہار کیا تھا۔
