عاصم اظہر کا نئے گانے اور سوشل میڈیا تنازع پر ردعمل، مداحوں کے تحفظات پر وضاحت جاری

کراچی( شوبز ڈیسک)کراچی میں پاکستانی گلوکار عاصم اظہر نے اپنے نئے گانے ’’تو ہے وہی دل نے جسے اپنا کہا‘‘ کے کور ورژن پر ہونے والی تنقید اور سوشل میڈیا تنازع پر پہلی بار کھل کر وضاحت پیش کی ہے۔نیا گانا ریلیز ہونے کے بعد سوشل میڈیا پر مختلف آراء سامنے آئیں۔ کچھ مداحوں نے اسے پسند کیا، تاہم کئی صارفین نے اس کلاسک گانے کے نئے ورژن کو تنقید کا نشانہ بناتے ہوئے کہا کہ اصل گانے کا معیار برقرار نہیں رکھا جا سکا۔اسی دوران سوشل میڈیا شخصیت رجب بٹ نے گانے کی حمایت میں ایک لپ سنک ویڈیو شیئر کی، جس پر عاصم اظہر نے ان کا شکریہ ادا کیا۔ تاہم اس حمایت کے بعد گلوکار کو سوشل میڈیا پر مزید تنقید کا سامنا کرنا پڑا۔بڑھتی ہوئی بحث کے بعد عاصم اظہر نے انسٹاگرام پر وضاحتی بیان جاری کیا جس میں انہوں نے کہا کہ کسی شخص کا شکریہ ادا کرنا یا اس کی محبت کا جواب دینا ہرگز اس بات کی علامت نہیں کہ وہ اس کی تمام آراء یا نظریات سے مکمل اتفاق رکھتے ہیں۔انہوں نے کہا کہ وہ اپنے مداحوں کے تحفظات کو سمجھتے ہیں اور بعض نکات سے اتفاق بھی کرتے ہیں، تاہم ان کا مقصد صرف محبت اور سپورٹ کا جواب دینا تھا۔