لاہور ( سپورٹس ڈیسک) پاکستانی فاسٹ بولر حارث رؤف نے اپنی بولنگ پر ہونے والی تنقید کا جواب دیتے ہوئے کہا ہے کہ صرف انہیں نہیں بلکہ دنیا بھر کے بولرز کو چھکے پڑتے ہیں اور وہ تنقید سے خوف زدہ نہیں ہوتے۔لاہور میں میڈیا سے گفتگو کرتے ہوئے حارث رؤف نے کہا کہ وہ ماضی میں بھی تنقید سے نہیں گھبرائے اور آئندہ بھی اس سے متاثر نہیں ہوں گے۔ وہ اپنے کھیل میں بہتری کے لیے محنت جاری رکھیں گے۔انہوں نے کہا کہ شاہین شاہ آفریدی اور نسیم شاہ کے ساتھ ان کا بنیادی مقصد حریف ٹیم کی وکٹیں حاصل کرکے پاکستان کو کامیابی دلانا ہے۔ ٹیم میں تمام کھلاڑی ایک دوسرے کا ساتھ دے رہے ہیں اور شاہین کی موجودگی بولنگ اٹیک کے لیے فائدہ مند ہے۔سہ ملکی سیریز میں کارکردگی پر بات کرتے ہوئے حارث رؤف نے کہا کہ 300 رنز کے ہدف کا دفاع کرنا مثبت پیش رفت ہے، تاہم جدید کرکٹ میں ٹیموں کو 350 یا اس سے زیادہ رنز بنانے اور ان کا دفاع کرنے کی صلاحیت بھی پیدا کرنا ہوگی۔انہوں نے مزید کہا کہ مڈل اوورز میں وکٹیں حاصل کرنا اہم ہے، کیونکہ بیٹنگ کا انداز تبدیل ہوچکا ہے۔ بولرز کو اپنی حکمت عملی بہتر بنانے کے ساتھ فٹنس اور رفتار پر بھی کام جاری رکھنا چاہیے۔
