لاہور ( سپورٹس ڈیسک) پاکستان کرکٹ بورڈ نے اوپننگ بیٹر صائم ایوب کی درخواست پر انہیں قومی اسکواڈ سے ریلیز کردیا، جبکہ ان کی جگہ صاحبزادہ فرحان کو طلب کرلیا گیا ہے۔پی سی بی کے مطابق صائم ایوب نے ڈومیسٹک کرکٹ میں اپنی بیٹنگ بہتر بنانے پر توجہ دینے کے لیے اسکواڈ سے ریلیز کرنے کی درخواست کی تھی، جسے ٹیم مینجمنٹ اور سلیکشن کمیٹی نے باہمی مشاورت سے منظور کرلیا۔ بورڈ نے ان کے موجودہ فارم کو مدنظر رکھتے ہوئے اس فیصلے کو سراہا ہے۔صاحبزادہ فرحان ان دنوں نیپال پریمیئر لیگ کے سلسلے میں کھٹمنڈو میں موجود ہیں۔ ذرائع کے مطابق انہیں قومی ذمہ داریوں کے لیے طلب کیا گیا ہے اور وہ پہلی دستیاب پرواز سے وطن واپس روانہ ہوں گے۔واضح رہے کہ مسلسل 3 فتوحات کے بعد فائنل کے لیے کوالیفائی کرنے والی پاکستانی ٹیم سہ ملکی سیریز کے پانچویں میچ میں منگل، 27 اکتوبر کو قذافی اسٹیڈیم لاہور میں سری لنکا کے مدمقابل ہوگی۔
