لاہور (پاکستان خبر)پنجاب حکومت نے بانی پی ٹی آئی عمران خان کی بہنوں علیمہ خان، عظمیٰ خان اور نورین نیازی کی نظربندی میں مزید 30 روز کی توسیع کردی۔لاہور ہائیکورٹ میں تینوں خواتین کی بازیابی کے لیے دائر درخواست پر جسٹس عبہر گل خان نے سماعت کی۔ اس موقع پر سیکرٹری داخلہ پنجاب اور سپرنٹنڈنٹ کوٹ لکھپت جیل عدالت میں پیش ہوئے۔عدالت میں جمع کرائی گئی سیکرٹری داخلہ کی رپورٹ میں بتایا گیا کہ تینوں خواتین کی نظربندی میں توسیع کردی گئی ہے۔ سرکاری وکیل کے مطابق ڈپٹی کمشنر نے پنجاب حکومت کو نظربندی میں توسیع کی تجویز بھیجی تھی، جس پر 7 اکتوبر کو توسیع کی گئی۔سماعت کے دوران عدالت نے درخواست گزار کے وکیل کی توجہ دلائی کہ نظربندی کا نوٹیفکیشن ڈپٹی کمشنر نے جاری کیا، لیکن درخواست میں انہیں فریق نہیں بنایا گیا۔ عدالت نے واضح کیا کہ وہ درخواست کے دائرہ کار سے باہر جاکر حکم جاری نہیں کرسکتی۔بعد ازاں لاہور ہائیکورٹ نے سیکرٹری داخلہ کی رپورٹ کی روشنی میں درخواست نمٹا دی۔
