کراچی ( شوبز ڈیسک)سینئر اداکارہ اسماء عباس نے ایک خاص عمر کے بعد شوہروں کے اپنی بیویوں کے ساتھ سرد رویے اور جذباتی فاصلے کے رجحان پر اپنے خیالات کا اظہار کیا ہے۔اسماء عباس اپنے وی لاگز میں اکثر سماجی مسائل اور انسانی رویوں پر کھل کر بات کرتی ہیں۔ حالیہ وی لاگ میں انہوں نے 60 سال کی عمر کے بعد شوہروں کے رویے میں آنے والی تبدیلی پر گفتگو کی۔انہوں نے کہا کہ اس عمر کے بعد اکثر شوہر کھل کر بات نہیں کرتے اور اپنے جذبات کا اظہار کم کر دیتے ہیں، جس کی وجہ سے بیویوں کو نظر انداز کیا گیا محسوس ہوتا ہے، جبکہ خواتین اس عمر میں بھی پوری طرح باشعور اور جذباتی طور پر حساس ہوتی ہیں۔اداکارہ کے مطابق ان کی مراد یہ نہیں کہ شوہر بات چیت بند کر دیتے ہیں، بلکہ وہ اپنی بیویوں کے ساتھ جذباتی تعلق اور محبت کے اظہار میں کمی کر دیتے ہیں۔انہوں نے کہا کہ شوہر اکثر یہ بھی نہیں کہتے کہ بیوی کا لباس اچھا لگ رہا ہے یا وہ آج خوبصورت لگ رہی ہیں، جس سے رشتہ میں محبت اور توجہ کا احساس کم ہو جاتا ہے۔
