شینزن( مانیٹرنگ ڈیسک) روسی صدر ولادیمیر پیوٹن نے کریمیا پُل پر حملے کے بعد دوٹوک اعلان کیا ہے کہ اب یوکرین کے ساتھ جنگ بندی کے لیے کوئی مذاکرات نہیں ہوں گے اور ماسکو اس حملے کا انتہائی سخت جواب دے گا۔چین کے شہر شینزن میں امریکی صدر ڈونلڈ ٹرمپ اور چینی صدر شی جن پنگ سے ملاقات کے بعد صحافیوں سے گفتگو کرتے ہوئے روسی صدر نے کہا کہ یوکرین کے بعض علاقوں میں محدود جنگ بندی کے امکان پر بات چیت ہوئی تھی، تاہم کرچ (کریمیا) پُل کو سنگین نقصان پہنچائے جانے کے بعد روس اب مذاکرات کو آگے نہیں بڑھائے گا۔نیوز کانفرنس کے دوران پیوٹن نے سخت تنبیہ کرتے ہوئے کہا کہ ماسکو کا جوابی وار پُل کو پہنچنے والے نقصان سے کہیں زیادہ سخت اور تکلیف دہ ہوگا۔ ان کا کہنا تھا کہ کریمیا پُل مکمل طور پر شہری آمدورفت کے لیے استعمال ہوتا ہے اور اس کے ذریعے نہ تو فوجی ساز و سامان یا گولہ بارود منتقل کیا جاتا ہے اور نہ ہی تیل یا پیٹرولیم مصنوعات کی ترسیل ہوتی ہے۔روسی صدر نے اس عزم کا بھی اظہار کیا کہ روس یوکرین کے علاقوں زاپوریزیا اور خیرسون میں اپنی عسکری موجودگی کو مزید مستحکم کرے گا اور زمینی راستوں کے تحفظ کے لیے تمام ضروری اقدامات اٹھائے جائیں گے۔واضح رہے کہ روسی سرزمین کو کریمیا سے ملانے والا 12 میل طویل یہ پُل غیر معمولی تزویراتی اور علامتی اہمیت کا حامل ہے، جس کا افتتاح 2018 میں صدر پیوٹن نے خود کیا تھا۔ رواں ہفتے ہونے والے میزائل حملے میں اس پُل کو شدید نقصان پہنچا ہے، جس کے جواب میں اسی روز روسی افواج نے بھی یوکرینی دارالحکومت کیف کے دو اہم پُلوں کو نشانہ بنایا۔