لاہور ( سپورٹس ڈیسک) پاکستان کرکٹ بورڈ (پی سی بی) نے 38 مرد کرکٹرز کے لیے نئے سینٹرل کنٹریکٹس کا باقاعدہ اعلان کر دیا ہے، جس میں محمد رضوان، امام الحق، صائم ایوب اور شان مسعود جیسے نمایاں کھلاڑی جگہ بنانے میں ناکام رہے۔ نئے کنٹریکٹس کی مدت 30 جون 2027 تک ہوگی۔پی سی بی کی جانب سے جاری کردہ تفصیلات کے مطابق سینئر بیٹر بابر اعظم اور سلمان علی آغا کو ٹیسٹ اور ون ڈے انٹرنیشنل کیٹیگری میں رکھا گیا ہے، جبکہ اذان اویس، محمد عباس، ساجد خان اور سعود شکیل صرف ٹیسٹ کیٹیگری کا حصہ ہوں گے۔اسی طرح ابرار احمد، عرفات منہاس، فخر زمان، فہیم اشرف، حارث رؤف اور شاہین شاہ آفریدی کو ون ڈے اور ٹی ٹوئنٹی انٹرنیشنل کی مشترکہ کیٹیگری میں شامل کیا گیا ہے۔ ٹی ٹوئنٹی انٹرنیشنل کیٹیگری میں حسن نواز، معاذ صداقت، محمد سلمان مرزا، نسیم شاہ، صاحبزادہ فرحان، شاداب خان اور عثمان طارق جگہ بنانے میں کامیاب رہے ہیں۔پاکستان کرکٹ بورڈ نے مستقبل کے قومی ٹیلنٹ کو نکھارنے اور فروغ دینے کے لیے 19 باصلاحیت نوجوان کھلاڑیوں کو ڈیولپمنٹ کیٹیگری میں بھی شامل کیا ہے۔ اس کیٹیگری میں عبدالصمد، عبداللہ فضل، احمد دانیال، علی رضا، فرحان یوسف، حنین شاہ، محمد طحہ، محمد طیب عارف، محمد غازی غوری، محمد عمران رندھاوا، رضا اللہ، سعد بیگ، سعد مسعود، سمیر منہاس، ثاقب خان، شاہ زیب خان، شامل حسین، سفیان مقیم اور عبید شاہ کے نام شامل ہیں۔