اسلام آباد ( کامرس ڈیسک)اسپیشل انویسٹمنٹ فیسلٹی کونسل (ایس آئی ایف سی) کے تحت ملک میں فارماسیوٹیکل کے شعبے میں خودکفالت کے حصول اور برآمدات کے فروغ کے لیے مؤثر اقدامات کیے جا رہے ہیں۔تفصیلات کے مطابق وفاقی وزیرِ صحت مصطفیٰ کمال اور نیشنل کوآرڈینیٹر کی زیرِ صدارت ایس آئی ایف سی کا ایک اعلیٰ سطحی اجلاس منعقد ہوا، جس میں پاکستان کے شعبۂ صحت اور فارماسیوٹیکل انڈسٹری کی بہتری و استحکام کے لیے اہم امور پر تبادلہ خیال کیا گیا۔اجلاس میں مقامی سطح پر ویکسین کی تیاری کے لیے مؤثر لائحہ عمل مرتب کرنے اور مستحق مریضوں کے خصوصی علاج کی شفاف منظوری کے طریقۂ کار پر تفصیلی غور کیا گیا۔ اس کے علاوہ اجلاس میں ادویات کی قیمتوں کے تعین اور عالمی منڈیوں میں رسائی بڑھانے کے لیے فارما ایکسپورٹ کونسل کے قیام پر بھی گفتگو ہوئی۔حکام کے مطابق ایس آئی ایف سی ویکسین کی مقامی تیاری میں خودکفالت حاصل کرنے اور پاکستانی فارماسیوٹیکل شعبے کی برآمدات کو فروغ دینے کے لیے پُرعزم ہے۔
ایس آئی ایف سی کا فارماسیوٹیکل برآمدات اور ویکسین سازی میں خودکفالت کا عزم
واپس خبروں پر
Category:
کامرس