لاہور( سپورٹس ڈیسک)پاکستان کرکٹ بورڈ نے بنگلادیش کے مؤقف کی حمایت میں آئی سی سی کو خط لکھے جانے سے متعلق خبروں پر لاعلمی ظاہر کر دی ہے۔ پی سی بی کے ترجمان کا کہنا ہے کہ ایسے کسی خط کے حوالے سے بورڈ کو کوئی باضابطہ معلومات حاصل نہیں۔ترجمان پی سی بی کے مطابق آئی سی سی کو بنگلادیش کے ٹی ٹوئنٹی ورلڈ کپ کے لیے بھارت نہ جانے کے معاملے پر کسی قسم کی تحریری درخواست یا خط سے بورڈ آگاہ نہیں ہے۔ انہوں نے واضح کیا کہ اس حوالے سے جو خبریں سامنے آئی ہیں، ان کا علم بھی ہمیں میڈیا کے ذریعے ہی ہوا ہے۔دوسری جانب بعض میڈیا رپورٹس میں دعویٰ کیا گیا ہے کہ پی سی بی نے ٹی ٹوئنٹی ورلڈ کپ میں بنگلادیش کی شرکت سے متعلق حتمی فیصلے سے ایک روز قبل آئی سی سی کو خط لکھ کر بنگلادیش کرکٹ بورڈ کے مؤقف کی حمایت کی تھی۔ان رپورٹس کے مطابق خط میں مؤقف اختیار کیا گیا کہ خطے میں موجود سیاسی حالات کے تناظر میں بنگلادیش کا بھارت میں میچز نہ کھیلنے کا فیصلہ قابلِ فہم ہے۔ ذرائع کا یہ بھی کہنا ہے کہ مذکورہ خط آئی سی سی بورڈ کے دیگر اراکین کو بھی ارسال کیا گیا تھا۔تاہم پاکستان کرکٹ بورڈ کی جانب سے ان دعوؤں کی باضابطہ طور پر تصدیق یا تردید نہیں کی گئی، جس کے باعث معاملہ تاحال غیر واضح ہے۔
