پشاور ( کامر س ڈیسک) حکومت نے سیف سٹی منصوبے کو پشاور کے بعد صوبے کے ضم شدہ اضلاع سمیت دیگر اضلاع تک توسیع دینے کا فیصلہ کیا ہے۔بجٹ دستاویزات کے مطابق آئندہ مالی سال کے لیے مختلف اضلاع میں منصوبے کے تحت 5 ارب 80 کروڑ روپے مختص کیے گئے ہیں، جبکہ پشاور میں کمانڈ اینڈ کنٹرول سینٹر کے قیام کے لیے 35 کروڑ روپے کا تخمینہ لگایا گیا ہے۔جرائم کی روک تھام اور دہشت گردی کے واقعات پر قابو پانے کے لیے منصوبے کو جنوبی و شمالی وزیرستان، اورکزئی، کرم، خیبر، مہمند، باجوڑ، کوہاٹ، ٹانک، مردان، سوات، کرک اور مانسہرہ تک پھیلانے کا فیصلہ کیا گیا ہے۔پشاور سیف سٹی منصوبے کے لیے مزید 70 کروڑ روپے مختص کرنے کی تجویز بھی بجٹ میں شامل ہے، جبکہ اس منصوبے پر پہلے ہی 2 ارب روپے سے زائد خرچ کیے جا چکے ہیں۔دستاویزات کے مطابق جنوبی و شمالی وزیرستان، اورکزئی اور کرم میں فیز ون کے لیے 1 ارب 80 کروڑ روپے مختص کیے گئے ہیں، جبکہ فیز ٹو میں خیبر، مہمند اور باجوڑ تک دائرہ کار بڑھانے کی تجویز ہے۔اسی طرح کوہاٹ، مردان اور سوات کے لیے 50 کروڑ روپے، کرک اور ٹانک کے لیے 35 کروڑ روپے اور مانسہرہ میں ابتدائی طور پر 2 کروڑ روپے مختص کرنے کی تجویز شامل ہے۔
