لندن ( سپورٹس ڈیسک) انٹرنیشنل ہاکی فیڈریشن (ایف آئی ایچ) نے ہاکی پرو لیگ کے دوران پاکستان کے قومی پرچم کی غلط نمائش پر پاکستان ہاکی فیڈریشن سے باضابطہ اور غیر مشروط معذرت کر لی ہے۔یہ واقعہ لندن میں پاکستان اور بھارت کے درمیان پرو لیگ میچ سے قبل قومی ترانوں کی تقریب کے دوران پیش آیا، جہاں پاکستان کے پرچم میں سفید حصہ درست طور پر شامل نہیں تھا۔ایف آئی ایچ ہاکی پرو لیگ کی ڈائریکٹر ہیلری اٹکنسن نے پاکستان ہاکی فیڈریشن کے صدر محی الدین احمد وانی کو لکھے گئے خط میں اس غلطی پر افسوس کا اظہار کیا۔ خط میں کہا گیا کہ قومی پرچم کسی بھی ٹیم کی شناخت اور وقار کی علامت ہوتا ہے، اور اس غلطی سے پاکستان ٹیم، اس کے مداحوں اور پاکستان ہاکی فیڈریشن کے جذبات مجروح ہوئے، جس پر ادارے کو گہرا افسوس ہے۔انہوں نے اس واقعے کی مکمل ذمہ داری قبول کرتے ہوئے اسے ایک انتظامی غلطی قرار دیا اور یقین دہانی کرائی کہ مستقبل میں ایسے واقعات سے بچنے کے لیے تمام انتظامی اور آپریشنل طریقہ کار کا ازسرنو جائزہ لیا جائے گا۔ایف آئی ایچ نے اپنے خط میں یہ بھی کہا کہ آئندہ کسی بھی ٹیم کے قومی تشخص اور وقار کے معاملے میں ایسی کوتاہی دوبارہ نہیں ہونے دی جائے گی، جبکہ تمام ٹیموں کے ساتھ احترام اور پیشہ ورانہ رویہ ان کی اولین ترجیح رہے گا۔
