ٹرمپ کا سینیٹ پر شدید ردعمل، ایران سے متعلق ووٹ کو بے معنی قرار دے دیا

واشنگٹن (مانیٹرنگ ڈیسک) امریکی صدر ڈونلڈ ٹرمپ نے ایران سے متعلق امریکی سینیٹ میں ہونے والی وار پاورز ایکٹ ووٹنگ پر شدید برہمی کا اظہار کرتے ہوئے اسے بے معنی قرار دے دیا ہے۔اپنے بیان میں صدر ٹرمپ نے کہا کہ انہوں نے ایران کو مکمل دباؤ میں لے رکھا ہے اور وہ ان کے بقول شکست کے دہانے پر کھڑا ہے۔ ان کے مطابق ایران اس وقت امریکا کے مطالبات ماننے پر آمادہ ہے اور کئی دہائیوں میں پہلی بار ایران امریکا اور اس کے صدر کا احترام کر رہا ہے۔ٹرمپ نے کہا کہ سینیٹ کا حالیہ ووٹ غیر ضروری اور وقت کے ضیاع کے مترادف ہے، جس سے ایران کو یہ غلط پیغام ملا ہے کہ امریکا اپنی کارروائیوں سے خوش نہیں ہے۔ ان کے مطابق اس فیصلے سے دشمن کو تقویت ملی ہے۔انہوں نے بعض ریپبلکن سینیٹرز پر بھی تنقید کرتے ہوئے کہا کہ ان کے اقدام سے ان کے لیے کام مزید مشکل ہو گیا ہے، تاہم وہ اپنے اہداف ہر صورت حاصل کریں گے۔واضح رہے کہ امریکی سینیٹ نے ایران کے خلاف فوجی کارروائی روکنے سے متعلق مشترکہ قرارداد 48 کے مقابلے میں 50 ووٹوں سے منظور کی ہے، جبکہ یہ قرار داد اس سے قبل ایوانِ نمائندگان سے بھی منظور ہو چکی تھی۔