بجٹ اقدامات پر کاروباری برادری کا ردعمل، تنخواہ دار طبقے کو مزید ریلیف دینے کا مطالبہ

 اسلام آباد( کامرس ڈیسک)اسلام آباد میں کاروباری برادری کے رہنماؤں نے بجٹ اقدامات پر ردعمل دیتے ہوئے تنخواہ دار طبقے کو مزید ریلیف دینے کا مطالبہ کیا ہے۔ایس ایم تنویر نے کہا کہ تنخواہ دار طبقے کو اس بار بھی مطلوبہ ریلیف نہیں دیا گیا اور اس میں مزید بہتری کی ضرورت تھی۔انہوں نے کہا کہ پراپرٹی کے لین دین پر ٹیکس میں کمی ایک قابلِ ستائش اقدام ہے، جبکہ لیٹ فائلر کی کیٹگری ختم کرنا بھی ایک مثبت قدم ہے۔ ان کے مطابق زرعی شعبے کی ترقی کے لیے مزید اقدامات ناگزیر ہیں۔ایس ایم تنویر نے یہ بھی کہا کہ تین ہزار ارب روپے کا دفاعی بجٹ موجودہ حالات میں ایک ضرورت ہے۔دوسری جانب عاطف اکرام شیخ نے کہا کہ حکومت نے کاروباری برادری کی کچھ تجاویز کو بجٹ میں شامل کیا ہے، تاہم پٹرولیم لیوی میں 18 فیصد اضافہ تشویشناک ہے۔انہوں نے مزید کہا کہ کارپوریٹ ٹیکس میں کمی کی تجویز دی گئی تھی لیکن بجٹ میں اس حوالے سے کوئی نمایاں قدم نہیں اٹھایا گیا۔