ورلڈ کپ 2026: جرمن ٹیم کو امریکا میں سخت سیکیورٹی چیک کا سامنا، ویڈیو وائرل

واشنگٹن( سپورٹس ڈیسک)فیفا ورلڈ کپ 2026 میں شریک جرمنی کی قومی فٹبال ٹیم کو امریکا میں سیکیورٹی چیک کے سخت مرحلے سے گزرنا پڑا، جس کی ویڈیو سامنے آنے کے بعد سوشل میڈیا پر بحث شروع ہو گئی ہے۔میڈیا رپورٹس کے مطابق جرمن ٹیم اپنے اگلے گروپ میچ کے لیے ٹورنٹو روانہ ہو رہی تھی کہ اس دوران امریکی سیکیورٹی اہلکاروں نے کھلاڑیوں اور کوچنگ اسٹاف کو مکمل تلاشی اور امیگریشن کارروائی سے گزارا۔ویڈیو میں کھلاڑیوں کو قطار میں کھڑے ہو کر مرحلہ وار چیکنگ سے گزرتے دیکھا جا سکتا ہے، جن میں جوشوا کمچ اور جمال موسیالا بھی شامل تھے۔جرمن فٹبال ایسوسی ایشن کی جانب سے اس کارروائی پر کسی اعتراض کا اظہار نہیں کیا گیا، جبکہ امریکی حکام نے بھی اس حوالے سے کوئی تفصیلی وضاحت جاری نہیں کی۔واضح رہے کہ ورلڈ کپ 2026 امریکا، کینیڈا اور میکسیکو کے مختلف شہروں میں کھیلا جا رہا ہے، جس کے باعث سیکیورٹی انتظامات کو انتہائی حساس اور سخت بنایا گیا ہے۔اس سے قبل بھی بعض ٹیموں کے ساتھ اسی نوعیت کے سیکیورٹی اقدامات رپورٹ ہو چکے ہیں، جس پر مختلف آرا سامنے آ رہی ہیں۔