واشنگٹن ( سپورٹس ڈیسک)فیفا ورلڈ کپ 2026 کے ابتدائی 10 دنوں میں ایک غیر معمولی رجحان سامنے آیا ہے، جس میں کھلاڑیوں کی جانب سے اپنی ہی ٹیم کے خلاف کیے گئے گولز، یعنی اون گولز، میں نمایاں اضافہ دیکھا گیا ہے۔اب تک ٹورنامنٹ میں 7 اون گولز ہو چکے ہیں، جو ورلڈ کپ کی تاریخ میں دوسرا بڑا مجموعہ ہے۔ اس سے قبل 2018 کے ورلڈ کپ میں 12 اون گولز کا ریکارڈ قائم ہوا تھا، جس کے ٹوٹنے کا امکان ظاہر کیا جا رہا ہے۔برطانوی خبر رساں ادارے کے مطابق 48 ٹیموں اور 104 میچز پر مشتمل اس توسیع شدہ ٹورنامنٹ میں میچز کی تعداد زیادہ ہونے کے باعث ایسے واقعات میں اضافہ دیکھا جا رہا ہے۔رپورٹ کے مطابق اون گولز کے واقعات میں پیراگوئے، آسٹریلیا، سوئٹزرلینڈ، قطر، مصر، عراق اور اردن کے کھلاڑی شامل ہیں، جن کے غلط گولز نے میچز کے نتائج پر براہِ راست اثر ڈالا۔اعداد و شمار کے مطابق ورلڈ کپ کی تاریخ میں اب تک 61 اون گولز ریکارڈ کیے جا چکے ہیں، جن میں سے ایک قابلِ ذکر حصہ موجودہ ٹورنامنٹ میں ہوا ہے۔دلچسپ بات یہ ہے کہ ورلڈ کپ کی تاریخ میں پانچ ایسے ایڈیشن بھی گزرے ہیں جن میں ایک بھی اون گول نہیں ہوا، جبکہ پہلی بار یہ واقعہ 1930 کے ورلڈ کپ میں سامنے آیا تھا۔ماہرین کے مطابق ٹورنامنٹ کی بڑھتی ہوئی شدت اور دباؤ اس رجحان کی بڑی وجوہات میں شامل ہو سکتے ہیں۔
