فیلڈ مارشل عاصم منیر ایران پہنچ گئے، امن و سکیورٹی امور پر بات چیت ہوگی

راولپنڈی( پاکستان خبر) چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر ایران کے دورے پر تہران پہنچ گئے۔ایرانی میڈیا کے مطابق ایرانی وزیر داخلہ سکندر مومنی نے فیلڈ مارشل عاصم منیر اور وزیر داخلہ محسن نقوی کا استقبال کیا، جس کے بعد دونوں کے درمیان تفصیلی ملاقات بھی ہوئی۔پاک فوج کے شعبہ تعلقات عامہ کے مطابق فیلڈ مارشل عاصم منیر ایران کے دورے پر گئے ہیں جبکہ وزیر داخلہ محسن نقوی بھی ان کے ہمراہ ہیں۔آئی ایس پی آر کا کہنا ہے کہ دورہ خطے میں امن و استحکام کے فروغ کے لیے پاکستان کی کوششوں کا حصہ ہے۔ پاکستان مشرق وسطیٰ میں دیرپا امن اور استحکام کا خواہاں ہے۔ترجمان پاک فوج کے مطابق فیلڈ مارشل عاصم منیر ایران میں جاری تنازع کے پرامن حل کے لیے کوششوں پر توجہ دیں گے۔دوسری جانب ایرانی وزارت خارجہ کے ترجمان اسماعیل بقائی نے کہا کہ پاکستان خطے میں کشیدگی کے خاتمے کے لیے کوششیں کر رہا ہے، جبکہ فیلڈ مارشل عاصم منیر کے دورے کے دوران دوطرفہ تعلقات اور سکیورٹی امور پر بھی بات چیت ہوگی۔