کراچی( شوبز ڈیسک) پاکستان کے سینئر اداکار فردوس جمال نے بالی ووڈ کے معروف اداکار شاہ رخ خان کی اداکاری پر تنقید کرتے ہوئے انہیں ایک بڑا سپر اسٹار قرار دیا، تاہم بطور اداکار ان کے مقام کو محدود قرار دیا۔حال ہی میں فردوس جمال ایک نجی ٹی وی کے مزاحیہ پروگرام میں بطور مہمان شریک ہوئے، جہاں انہوں نے مختلف فنکاروں اور ان کی فنی صلاحیتوں کے بارے میں اپنی رائے کا اظہار کیا۔فردوس جمال نے کہا کہ وہ بالی ووڈ کے لیجنڈ اداکار دلیپ کمار کے مداح ہیں، لیکن شاہ رخ خان کا دلیپ کمار سے موازنہ مناسب نہیں۔ ان کے مطابق دلیپ کمار ایک منفرد اور عظیم فنکار تھے، جبکہ شاہ رخ خان اس معیار کی اداکاری پیش نہیں کر سکے۔انہوں نے مزید کہا کہ شاہ رخ خان کی اداکاری، تلفظ اور گفتگو کے انداز میں وہ پختگی دکھائی نہیں دیتی جو ایک عظیم اداکار کی پہچان سمجھی جاتی ہے۔فردوس جمال کا کہنا تھا کہ شاہ رخ خان اپنی غیر معمولی مقبولیت کے باعث ایک بڑے سپر اسٹار ضرور ہیں، لیکن بطور اداکار ان کا مقام اتنا بلند نہیں جتنا ان کی شہرت اور مداحوں کی تعداد ہے۔
