اسلام آباد( کامرس ڈیسک)ملک میں آٹے کے بحران اور قیمتوں میں مسلسل اضافے کے باعث 20 کلو آٹے کے تھیلے کی قیمت 2800 روپے کی بلند ترین سطح تک جا پہنچی ہے۔نجی ٹی وی کی رپورٹ کے مطابق ادارہ شماریات کی حالیہ دستاویزات میں بتایا گیا ہے کہ کراچی کے شہری سب سے مہنگا آٹا خریدنے پر مجبور ہیں، جہاں 20 کلو آٹے کا تھیلا 2800 روپے میں دستیاب ہے۔اسی طرح پشاور میں یہی تھیلا 2750 روپے، اسلام آباد میں 2733 روپے جبکہ راولپنڈی میں اس کی قیمت 2707 روپے تک پہنچ چکی ہے۔کوئٹہ اور بنوں میں بھی 20 کلو آٹے کی قیمت تقریباً 2700 روپے تک جا پہنچی ہے۔ دیگر شہروں میں حیدرآباد میں قیمت 2600 روپے، خضدار اور لاڑکانہ میں 2400 روپے، فیصل آباد میں 2350 روپے جبکہ گجرانوالہ میں 2333 روپے مقرر کی گئی ہے۔ادھر ملتان اور لاہور میں بھی آٹے کے نرخوں میں مسلسل اضافہ دیکھا جا رہا ہے۔ دستاویزات کے مطابق ملتان میں 20 کلو آٹے کا تھیلا 2267 روپے تک پہنچ گیا ہے جبکہ لاہور میں یہ قیمت 2250 روپے ریکارڈ کی گئی ہے، جس سے عام شہری پر مہنگائی کا بوجھ مزید بڑھ گیا ہے۔آٹے کی قیمتوں میں اس غیر معمولی اضافے کے باعث عام آدمی کی قوتِ خرید شدید متاثر ہو رہی ہے۔ماہرینِ معیشت کے مطابق گندم کی ترسیل میں رکاوٹیں اور ذخیرہ اندوزی پر مؤثر کارروائی نہ ہونا اس بحران کی بنیادی وجوہات ہیں، جن پر فوری قابو پانے کی ضرورت ہے۔
