دبئی( سپورٹس ڈیسک)آئی سی سی مینز ایک روزہ عالمی کپ 2027ء گزشتہ دو عالمی کپ کے مقابلے میں زیادہ ٹیموں کے ساتھ کھیلا جائے گا، جس میں پہلی مرتبہ 14 ٹیمیں حصہ لیں گی۔میزبان جنوبی افریقا اور زمبابوے کو میزبانی کی بنیاد پر عالمی کپ میں براہ راست جگہ مل چکی ہے، جبکہ 30 ستمبر کو جاری ہونے والی آئی سی سی ایک روزہ درجہ بندی میں میزبان ممالک کے علاوہ ابتدائی 8 ٹیموں کو بھی براہ راست ٹورنامنٹ میں رسائی حاصل ہوگی۔افغانستان نے بیلفاسٹ میں آئرلینڈ کے خلاف سنسنی خیز کامیابی حاصل کرکے ابتدائی 8 ٹیموں میں اپنی جگہ تقریباً پکی کرلی ہے۔یوں دفاعی چیمپئن آسٹریلیا کے علاوہ بھارت، نیوزی لینڈ، پاکستان، سری لنکا، انگلینڈ، بنگلادیش اور افغانستان براہ راست عالمی کپ کے لیے کوالیفائی کرنے والی ٹیموں میں شامل ہوں گے، جبکہ جنوبی افریقا اور زمبابوے میزبان کی حیثیت سے پہلے ہی ٹورنامنٹ کا حصہ بن چکے ہیں۔
