کراچی(پاکستان خبر)گلگت میں پاکستان پیپلز پارٹی گلگت بلتستان کی پارلیمانی پارٹی کا اہم اجلاس منعقد ہوا جس کی صدارت پارٹی کے مرکزی جنرل سیکرٹری سینیٹر نیر حسین بخاری نے کی۔اجلاس میں حالیہ انتخابات کے نتائج کا تفصیلی جائزہ لیا گیا اور شرکاء نے اس بات پر اطمینان کا اظہار کیا کہ پیپلز پارٹی انتخابات میں سب سے بڑی جماعت کے طور پر سامنے آئی ہے۔اجلاس میں یہ بھی کہا گیا کہ چیئرمین بلاول بھٹو زرداری اور آصفہ بھٹو زرداری کی انتخابی مہم کے باعث پارٹی کو خطے میں نمایاں کامیابی حاصل ہوئی۔شرکاء نے حکومت سازی کے مختلف امکانات پر غور کیا اور آئندہ کے سیاسی لائحہ عمل پر تفصیلی مشاورت کی گئی۔ اجلاس میں اراکین نے چیئرمین بلاول بھٹو زرداری پر مکمل اعتماد کا اظہار کرتے ہوئے حکومت سازی کے فیصلوں کا اختیار انہیں سونپ دیا۔پارلیمانی پارٹی کے مطابق پارٹی قیادت جو بھی فیصلہ کرے گی، اسے گلگت بلتستان کے عوام اور پارٹی کے وسیع تر مفاد میں قبول کیا جائے گا۔
