لاہور( سپورٹس ڈیسک)کھیلوں کے پس منظر رکھنے والی لاہور کی تین سگی بہنوں نے ایک ساتھ ورلڈ ایتھلیٹکس کے سی ای سی ایس لیول ون کوچنگ کورس میں کامیابی حاصل کر کے نمایاں اعزاز اپنے نام کر لیا۔آمنہ شہزاد، عائشہ شہزاد اور فاطمہ شہزاد کا تعلق ایک معروف اسپورٹس فیملی سے ہے۔ ان کے دادا فیاض محمود قریشی قومی سطح کے ایتھلیٹ رہ چکے ہیں جبکہ ان کے والد شہزاد قریشی قومی سطح کے سوئمر رہے ہیں اور اس وقت کرکٹ کوچنگ سے وابستہ ہیں۔تینوں بہنیں بی ایس ہیلتھ اینڈ فزیکل ایجوکیشن کی طالبات ہیں۔ آمنہ شہزاد آٹھویں سمسٹر میں ہیں جبکہ عائشہ اور فاطمہ چھٹے سمسٹر کی طالبات ہیں۔حال ہی میں لاہور میں پاکستان ایتھلیٹکس فیڈریشن کے زیر اہتمام ورلڈ ایتھلیٹکس کا کوچز ایجوکیشن سرٹیفکیشن سسٹم لیول ون کورس منعقد کیا گیا، جس میں سینئر کوچز کے ساتھ یہ تینوں بہنیں بھی شریک ہوئیں اور اپنی کارکردگی سے سب کی توجہ کا مرکز بن گئیں۔تینوں بہنوں نے کامیابی کے ساتھ کورس مکمل کیا اور ورلڈ ایتھلیٹکس کا سرٹیفکیٹ حاصل کیا۔ ان کا کہنا ہے کہ سینئر کوچز کے ساتھ یہ کورس مکمل کرنا ان کے لیے ایک بڑا اعزاز ہے اور وہ مزید لیولز مکمل کر کے کوچنگ کے شعبے میں آگے بڑھنے کا ارادہ رکھتی ہیں۔انہوں نے مزید کہا کہ ان کی تعلیمی پس منظر نے کورس کے دوران انہیں کافی مدد فراہم کی اور عملی تربیت کے دوران انہیں کسی بڑی مشکل کا سامنا نہیں کرنا پڑا۔
