لاہور( شوبز ڈیسک)پاکستانی اداکار اور میزبان عمران اشرف نے سوشل میڈیا پر گردش کرنے والی اپنی موت کی جعلی خبر کی تردید کرتے ہوئے مداحوں کو اپنی خیریت سے آگاہ کردیا۔سوشل میڈیا پر مصنوعی ذہانت سے تیار کردہ ایک ویڈیو تیزی سے وائرل ہوئی، جس میں عمران اشرف کے انتقال کی خبر نشر کی گئی تھی۔ جعلی ویڈیو کے باعث ان کے مداحوں میں تشویش پھیل گئی۔صورتحال واضح کرنے کے لیے عمران اشرف نے خود سوشل میڈیا پر بیان جاری کیا اور مداحوں کو بتایا کہ وہ بالکل خیریت سے ہیں۔ انہوں نے اپنی انسٹاگرام پوسٹ میں دعاؤں کی درخواست کرتے ہوئے کہا کہ الحمدللہ وہ ٹھیک ہیں اور وائرل ہونے والی خبر جعلی ہے۔یہ جعلی ویڈیو ایک ٹک ٹاک اکاؤنٹ پر شیئر کی گئی تھی، جہاں اسی نوعیت کی مزید مصنوعی ویڈیوز بھی موجود تھیں۔ ان ویڈیوز میں سینئر صحافیوں، کرکٹرز اور اداکاروں کو عمران اشرف کے انتقال پر تعزیت کرتے ہوئے دکھایا گیا تھا۔
