ممبئی( مانیٹرنگ ڈیسک)اسلام آباد میں امریکا اور ایران کے درمیان جنگ بندی میں پاکستان کے کردار کو عالمی سطح کے ساتھ ساتھ بھارت میں بھی غیر معمولی پذیرائی مل رہی ہے۔سماجی رابطے کی ویب سائٹ پر پاکستان عالمی امن کا علمبردار کے عنوان سے رجحان نمایاں رہا جہاں بھارتی صارفین، تجزیہ کاروں اور دانشوروں نے پاکستان کی سفارتی کوششوں کو سراہا۔وزیراعظم شہباز شریف اور عسکری قیادت کو خطے میں امن کے قیام کے لیے مؤثر اور مثبت کردار کا حامل قرار دیا جا رہا ہے۔بھارتی پروفیسر اشوک سوین نے اس پیش رفت کو ایران کے لیے کامیابی اور پاکستان کے لیے اعزاز قرار دیتے ہوئے کہا کہ اس سے پاکستان کی عالمی اہمیت میں اضافہ ہوا ہے۔دفاعی تجزیہ کار پراوین ساہنی نے وزیراعظم کی سفارتی کاوشوں کو شاندار قرار دیا جبکہ مصنف اتل کھتری نے بھی پاکستان کے کردار کو سراہتے ہوئے امن کے لیے اس کی کوششوں کو قابل تعریف کہا۔اسی طرح دانشور جیانت بھنڈاری کا کہنا تھا کہ پاکستان نے مؤثر قیادت کی صلاحیت کا مظاہرہ کیا ہے جبکہ دفاعی امور کے ماہر ابھیجیت آیئر مترا نے بھی پاکستان کی ثالثی کو مہارت اور جرات کا مظہر قرار دیا۔تجزیہ کاروں کے مطابق اس پیش رفت نے پاکستان کی سفارتی ساکھ کو مزید مضبوط کیا ہے اور اسے عالمی سطح پر ایک اہم کردار کے طور پر اجاگر کیا ہے۔
