شندور( سپورٹس ڈیسک) شندور کے بلند پہاڑی میدانوں میں پولو کھیلوں کا میلہ 2026 کے دوسرے روز بھی مقابلے بھرپور انداز میں جاری رہے۔ایک سنسنی خیز مقابلے میں چترال کی ٹیم نے گلگت کی ٹیم کو ایک گول سے شکست دے دی۔ میچ میں چترال نے تین جبکہ گلگت نے دو گول اسکور کیے۔ دونوں ٹیموں نے شاندار کھیل کا مظاہرہ کیا اور شائقین نے بھرپور دلچسپی کے ساتھ مقابلہ دیکھا۔یہ میلہ خیبر پختونخوا اور گلگت بلتستان کی حکومتوں اور پاک فوج کے تعاون سے منعقد کیا جا رہا ہے۔ افتتاحی تقریب کے مہمان خصوصی گورنر خیبر پختونخوا نے اسے قومی یکجہتی، ثقافتی ہم آہنگی اور سیاحت کے فروغ کے لیے اہم قرار دیا۔افتتاحی روز روایتی حریف چترال اور گلگت بلتستان کے درمیان کانٹے دار مقابلہ ہوا، جبکہ شائقین نے کھلاڑیوں کی کارکردگی کو خوب سراہا۔ اس موقع پر فضائی کرتب بازی کا شاندار مظاہرہ بھی کیا گیا جس نے حاضرین کی توجہ حاصل کی۔یہ پولو کھیلوں کا میلہ تین دن تک جاری رہے گا جس میں ملک بھر سے سیاح اور کھیلوں کے شائقین بڑی تعداد میں شرکت کر رہے ہیں۔
