اگر امریکہ خطے میں محفوظ رہنا چاہتا ہے تو اسے مشرق وسطیٰ سے نکل جانا چاہیے: ایران

تہران( مانیٹرنگ ڈیسک) ایران کے وزیر خارجہ عباس عراقچی نے کہا ہے کہ اگر امریکہ خطے میں محفوظ رہنا چاہتا ہے تو اسے مشرق وسطیٰ سے نکل جانا چاہیے۔سوشل میڈیا پلیٹ فارم پر جاری بیان میں انہوں نے کہا کہ امریکہ نے اپنی ناکامیوں کے باوجود ایران کے عزم کو آزمانے کا فیصلہ کیا ہے، تاہم ایرانی مسلح افواج کسی بھی حملے کا بھرپور جواب دینے کی صلاحیت رکھتی ہیں۔انہوں نے واضح کیا کہ خطے میں موجود غیر ملکی فوجی اڈے مسلسل خطرے میں رہتے ہیں اور کسی بھی حادثے یا کشیدگی کی صورت میں صورتحال مزید بگڑ سکتی ہے۔ایرانی وزیر خارجہ کے مطابق کشیدگی میں کمی کا واحد مؤثر حل غیر ملکی افواج کا انخلا ہے، جبکہ ایران سفارت کاری کو ترجیح دیتا ہے لیکن اپنے دفاع کے تمام آپشنز بھی محفوظ رکھتا ہے۔عباس عراقچی نے مزید کہا کہ ایران کی مسلح افواج فضائی، زمینی اور بحری حدود کی حفاظت کے لیے مکمل طور پر تیار ہیں اور کسی بھی خلاف ورزی کا فوری جواب دیا جائے گا۔انہوں نے آبنائے ہرمز سے متعلق مؤقف دہراتے ہوئے کہا کہ یہ خطہ ایران اور عمان کے درمیان مشترکہ آبی گزرگاہ ہے اور اس کی حدود واضح ہیں۔