ایران امریکا جوہری معاہدے سے اسرائیلی پالیسی میں تبدیلی نہیں آئے گی، نیتن یاہو

تل ابیب( مانیٹرنگ ڈیسک) تل ابیب میں اسرائیلی وزیرِ اعظم بینجمن نیتن یاہو نے کہا ہے کہ ایران اور امریکا کے درمیان ہونے والے جوہری معاہدے سے اسرائیل کے مؤقف میں کوئی تبدیلی نہیں آئے گی۔پریس کانفرنس کے دوران انہوں نے کہا کہ اسرائیل کو معاہدے کی تفصیلات کا مکمل علم نہیں ہے، تاہم اس سفارتی پیش رفت کے باوجود اسرائیل کی سکیورٹی اور فوجی پالیسی وہی رہے گی۔نیتن یاہو نے واضح کیا کہ معاہدہ ہو یا نہ ہو، ایران کو کبھی بھی جوہری ہتھیار حاصل نہیں کرنے دیے جائیں گے۔انہوں نے ایران کے خلاف حالیہ اسرائیلی کارروائیوں کا دفاع کرتے ہوئے کہا کہ ان اقدامات کا مقصد بڑے خطرات کو روکنا تھا۔ان کے مطابق امریکا کے ساتھ مل کر اسرائیل نے ایران کے جوہری پروگرام اور عسکری ڈھانچے کو نشانہ بنایا، جس سے ایران کی دفاعی صلاحیتوں اور معیشت کو بھاری نقصان پہنچا۔نیتن یاہو نے مزید کہا کہ ایران کو ہونے والے معاشی نقصان کی بحالی میں کئی دہائیاں لگ سکتی ہیں، جبکہ بعض اندازوں کے مطابق یہ نقصان کھربوں ڈالر تک پہنچ چکا ہے۔