لاہور( سپورٹس ڈیسک) کرکٹ آئرلینڈ نے افغانستان کے سابق ہیڈ کوچ جوناتھن ٹراٹ کو افغانستان کے خلاف آئندہ ون ڈے سیریز کے لیے مختصر مدت کے کنسلٹنٹ کے طور پر مقرر کردیا ہے۔کرکٹ آئرلینڈ کے مطابق جوناتھن ٹراٹ اگلے ہفتے آئرلینڈ کی مردوں کی کرکٹ ٹیم کو جوائن کریں گے اور 14 روز تک ٹیم کے ساتھ رہ کر افغانستان کے خلاف ہوم سیریز کی تیاریوں میں معاونت فراہم کریں گے۔سابق انگلش کرکٹر ٹراٹ سیریز سے قبل آئرش ٹیم کی تیاریوں میں رہنمائی کریں گے، جبکہ پہلے اور دوسرے ون ڈے میچ کے دوران بھی ٹیم کو حکمت عملی بنانے میں مدد دیں گے۔کرکٹ آئرلینڈ کا کہنا ہے کہ جوناتھن ٹراٹ کی شمولیت افغانستان کے خلاف سیریز کی بہتر منصوبہ بندی کے ساتھ ساتھ 2027 کے اوائل میں ہونے والے آئی سی سی مینز کرکٹ ورلڈ کپ کوالیفائر کی تیاریوں میں بھی اہم ثابت ہوگی۔
