اسلام آباد (سپورٹس ڈیسک) اسلام آباد ہائیکورٹ نے پاکستان بیڈمنٹن فیڈریشن کے 24 اکتوبر 2025ء کو ہونے والے انتخابات غیر قانونی قرار دیتے ہوئے نئے انتخابات 90 روز کے اندر کرانے کا حکم دے دیا ہے۔عدالتِ عالیہ کے فیصلے کے مطابق پاکستان اسپورٹس بورڈ کا انتخابی کمیشن اپنے آئین کے آرٹیکل 17 کے تحت نئے انتخابات کا انعقاد کرے گا۔ انتخابی شیڈول جاری کرنے سے لے کر نتائج کے اعلان تک تمام مراحل 90 روز میں مکمل کرنے کی ہدایت کی گئی ہے۔عدالت نے نئے انتخابات مکمل ہونے تک فیڈریشن کے انتظامی امور چلانے کے لیے عارضی کمیٹی قائم کرنے کا بھی حکم دیا ہے۔ یہ کمیٹی وفاقی وزارتِ بین الصوبائی رابطہ کے ایڈیشنل سیکریٹری کی سربراہی میں تشکیل دی جائے گی، جبکہ ڈائریکٹر نیشنل اسپورٹس فیڈریشنز اس کے رکن ہوں گے۔عدالتی حکم کے مطابق کمیٹی میں پنجاب، خیبر پختونخوا، سندھ اور بلوچستان سے ایک ایک سابق بیڈمنٹن چیمپئن کو بھی شامل کیا جائے گا۔فیصلے میں مزید کہا گیا ہے کہ پاکستان بیڈمنٹن فیڈریشن کی نئی منتخب باڈی کے عہدے سنبھالنے تک عارضی کمیٹی روزمرہ انتظامی امور انجام دے گی۔