اسلام آباد ( کامرس ڈیسک)پاکستان میں صنعتی ترقی، سرمایہ کاری اور برآمدات بڑھانے کے لیے اہم پیشرفت سامنے آئی ہے، جہاں خصوصی سرمایہ کاری سہولت کونسل (ایس آئی ایف سی) کی معاونت سے کراچی انڈسٹریل پارک کو وفاقی اسپیشل اکنامک زون کی حیثیت سے منظوری دے دی گئی ہے۔ملک میں کاروباری سرگرمیوں کو آسان بنانے اور صنعتی شعبے میں سرمایہ کاری بڑھانے کے لیے ایس آئی ایف سی کی اصلاحاتی کوششیں جاری ہیں۔ اسی سلسلے میں وزیراعظم کے مشیر برائے صنعت و پیداوار ہارون اختر اور ایس آئی ایف سی حکام نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے وفد سے ملاقات کی۔اجلاس میں کاروباری سہولتوں، ڈیجیٹل نظام میں بہتری، آسان کاروبار پروگرام اور سندھ کی معاشی و ترقیاتی صلاحیت سے بھرپور فائدہ اٹھانے کے امور پر تبادلہ خیال کیا گیا۔منظور شدہ کراچی انڈسٹریل پارک میں بندرگاہ تک رسائی، جدید بنیادی سہولتیں اور برآمدی صنعتوں کے لیے خصوصی مراعات فراہم کی جائیں گی۔ان اقدامات سے صنعتی سرمایہ کاری میں اضافے، کاروباری مسابقت بہتر بنانے اور ملکی برآمدات کو فروغ دینے میں مدد ملنے کی توقع ہے۔