برگن اسٹاک، سوئٹزرلینڈ (مانیٹرنگ ڈیسک)مفاہمتی معاہدے پر دستخط کے بعد امریکا اور ایران کے نمائندے پاکستان، قطر اور دیگر متعلقہ ممالک کے اعلیٰ حکام کے ساتھ کل (جمعے کو) سوئٹزرلینڈ کے برگن اسٹاک میں ملاقات کریں گے۔سوئس وزارتِ خارجہ کے مطابق ایران اور امریکا کے درمیان طے پانے والے مفاہمتی معاہدے کے بعد اس پر عمل درآمد سے متعلق ابتدائی مذاکرات برگن اسٹاک ریزورٹ میں ہوں گے، جہاں مختلف فریقین شریک ہوں گے۔بیان میں مزید کہا گیا ہے کہ اس اجلاس میں امریکا اور ایران کے نمائندوں کے ساتھ ثالثی کرنے والے ممالک، جن میں پاکستان اور قطر بھی شامل ہیں، شرکت کریں گے۔ تاہم اجلاس کے شیڈول اور تفصیلات ابھی تک مکمل طور پر جاری نہیں کی گئیں۔رپورٹس کے مطابق اس سے قبل فرانس کے تاریخی ورسائی محل میں ہونے والے ایک عشائیے کے دوران اہم سفارتی پیش رفت سامنے آئی، جس کے بعد صورتحال میں تیزی آئی۔وائٹ ہاؤس کے ایک عہدیدار نے تصدیق کی ہے کہ امریکی صدر ڈونلڈ ٹرمپ نے فرانسیسی صدر ایمانوئل میکرون کی موجودگی میں ایران کے ساتھ مفاہمتی یادداشت پر دستخط کیے، جبکہ ایرانی صدر مسعود پزشکیان نے بھی اس معاہدے پر دستخط کیے۔یہ معاہدہ نافذ العمل ہو چکا ہے اور اس کا بنیادی مقصد کشیدگی میں کمی اور جنگ کے خاتمے کی جانب پیش رفت بتایا جا رہا ہے، جبکہ اسی پیش رفت کے باعث جنیوا میں طے شدہ باضابطہ دستخطی تقریب منسوخ کر دی گئی ہے۔
