لاہور( پاکستان خبر)لاہور ہائی کورٹ میں سولہ سال سے کم عمر بچوں کے سوشل میڈیا استعمال پر پابندی عائد کرنے کے لیے دائر درخواست پر سماعت ہوئی۔ یہ درخواست آٹھویں جماعت کی طالبہ علایا سلیم نے اپنی وکیل شیزا قریشی کے ذریعے دائر کی تھی۔چیف جسٹس مس عالیہ نیلم نے سماعت کے دوران وفاقی حکومت، پاکستان ٹیلی کمیونیکیشن اتھارٹی (پی ٹی اے) اور دیگر متعلقہ اداروں سے ایک ہفتے کے اندر جواب طلب کر لیا۔ عدالت نے کہا کہ یہ ایک اہم معاملہ ہے اور اس پر فوری توجہ دی جائے۔درخواست میں موقف اختیار کیا گیا کہ سوشل میڈیا بچوں کی ذہنی، اخلاقی اور تعلیمی نشوونما پر منفی اثر ڈال رہا ہے اور ریاست کی ذمہ داری ہے کہ وہ بچوں کے بنیادی حقوق کے تحفظ کو یقینی بنائے۔مزید کہا گیا کہ ٹک ٹاک سمیت دیگر سوشل میڈیا پلیٹ فارمز کا استعمال کمسن بچوں کی نفسیات پر منفی اثرات مرتب کر رہا ہے۔ درخواست میں استدعا کی گئی کہ سولہ سال سے کم عمر بچوں کے لیے سوشل میڈیا استعمال پر پابندی عائد کی جائے۔
