کراچی ( شوبز ڈیسک) عالمی شہرت یافتہ پاکستانی اداکارہ ماہرہ خان نے کراچی کے نوجوان تاجر میر رضا کے قتل کے معاملے پر اپنے خیالات کا اظہار کرتے ہوئے مقتول کے وکیل جبران ناصر کو خراجِ تحسین پیش کیا ہے۔گزشتہ چند روز سے جبران ناصر کے بیانات کی ویڈیوز سماجی رابطوں کی ویب سائٹس پر گردش کررہی ہیں۔ ماہرہ خان نے بھی جبران ناصر کے ایک بیان پر تبصرہ کرتے ہوئے ان کی کاوشوں کو سراہا۔اداکارہ نے اپنے پیغام میں کہا کہ جبران ناصر بہترین کام کررہے ہیں اور اس ناانصافی کے خلاف سب کو آواز بلند کرنی چاہیے۔ انہوں نے مزید کہا کہ یہ سب کچھ اب ختم ہونا چاہیے۔واضح رہے کہ ہفتے کو میر رضا کی قبرکشائی کے بعد سامنے آنے والی ابتدائی طبی رپورٹ میں بتایا گیا کہ انہیں پیچھے سے گولی ماری گئی تھی، جبکہ جسم پر تشدد کے نشانات بھی موجود تھے۔ رپورٹ میں دائیں ران اور جبڑے میں ہڈی ٹوٹنے کے شواہد بھی ملے، جبکہ جسم کے نچلے حصے کے بافتوں پر خون کے دھبے پائے گئے۔کیس کی تحقیقات کے دوران مزید انکشاف ہوا کہ فرانزک لیبارٹری بھیجے گئے کپڑوں کے جائزے میں مقتول کے ہاتھوں اور چہرے پر تیزاب ڈالے جانے کے شواہد سامنے آئے۔ تفتیشی ذرائع کے مطابق تیزاب ڈالنے کا مقصد مقتول کی شناخت کو ختم کرنا تھا۔
