سعودی عرب کی بڑی مالی مدد، پاکستان کو دو ارب ڈالر موصول، ذخائر کو سہارا مل گیا

کراچی(کامرس ڈیسک) پاکستان کو سعودی عرب کی جانب سے دو ارب ڈالر کے ڈپازٹ موصول ہو گئے ہیں، جس سے ملکی زرمبادلہ ذخائر کو سہارا ملے گا۔سٹیٹ بینک نے تصدیق کی ہے کہ سعودی عرب نے نہ صرف دو ارب ڈالر فراہم کیے بلکہ موجودہ پانچ ارب ڈالر کے ڈپازٹ کی مدت میں بھی توسیع کر دی ہے، جسے اب طویل مدت کے لیے برقرار رکھا جائے گا۔وزارت خزانہ کے ذرائع کے مطابق یہ ڈپازٹ اب سالانہ بنیاد پر تجدید کا پابند نہیں رہے گا بلکہ اسے مستقل بنیادوں پر بڑھا دیا گیا ہے، جو پاکستان کی مالی ضروریات کے لیے اہم پیش رفت ہے۔حکام کا کہنا ہے کہ یہ معاونت ایسے وقت میں ملی ہے جب ملک کو بیرونی مالیاتی دباؤ کا سامنا ہے، اس اقدام سے زرمبادلہ ذخائر مضبوط ہوں گے اور بیرونی کھاتوں میں استحکام آئے گا۔مزید بتایا گیا ہے کہ حکومت معاشی پروگرام کے تحت ذخائر کو اٹھارہ ارب ڈالر تک بڑھانے کے لیے کوشاں ہے تاکہ درآمدات کے لیے مناسب مالی گنجائش برقرار رکھی جا سکے۔ذرائع کے مطابق رواں ماہ متحدہ عرب امارات کو تین اعشاریہ پانچ ارب ڈالر کی ادائیگی درکار ہے، تاہم سعودی تعاون کے باعث اس ادائیگی کے اثرات کو کم کرنے میں مدد ملے گی۔